अमिरबाट फिफाको मुख्य कार्यालयको निरीक्षण

अमिर शेख तमिम बिन हमाद अल थानीले फिफाको मुख्यालयको निरीक्षण गर्नुभएको छ ।

विश्वकपको अन्तिम तयारी बारे बुझ्न अमिर हिजो अल कासरस्थित दोहा एक्जिबिसन सेन्टरमा रहेको फिफाको मुख्य कार्यालय पुग्नुभएको थियो ।

अमिरलाई फिफाको र आयोजक देशको मुख्य अपरेशन कमाण्ड सेन्टरको बारेमा जानकारी गराइएको थियो । भ्रमणको क्रममा अमिरलाई प्रतियोगिताको अन्तिम तयारीको विवरण बारे जानकारी गराई प्रतियोगिता आयोजनाका लागि उच्चतम अन्तर्राष्ट्रिय मापदण्डको प्रयोगको सुनिश्चित गरिएको थियो ।

भ्रमणका क्रममा अमिरसँग व्यक्तिगत प्रतिनिधि शेख जसिम बिन हमाद अल थानी,प्रधानमन्त्री तथा  आन्तरिक मन्त्री शेख खालिद बिन खलिफा बिन अब्दुलअजीज अल थानी, फिफाका अध्यक्ष जियानी इन्फान्टिनो लगायत अन्य वरिष्ठ अधिकारीहरू उपस्थित रहेका थिए ।