अल वाब स्ट्रिटको ५.५ किलोमिटर लामो सडक विस्तारको काम सकियो

सार्वजनिक निर्माण प्राधिकरण (असघाल)ले अल वाब स्ट्रिटको ५.५ किलोमिटर लामो सडक विस्तारको काम सकाएको छ ।

अल अजिजिया, मेहेरजा, बाया, लुएब, मुरैख र मुएथरको ट्राफिक आवागमन सहज बनाउन असघालले केही महिना अघि मात्र काम सुरु गरेको थियो ।

ट्राफिकको लागि खुला भएपछि दोहा एक्सप्रेसवे, सबा अल अहमद कोरिडोर, अल फुरुसिया र अल सैलिया स्ट्रिटबाट आउने सडक प्रयोगकर्ताको लागि यो सल्वा रोडको वैकल्पिक मार्ग बनेको छ ।

विस्तार कार्य अन्तर्गत सडकलाई तीन बाट चार लेनमा बढाइएको छ र महिरजा, खलिफा ओलम्पिक सिटी,स्पोर्ट्स हल र बाया ईन्टरसेक्सन जोड्ने गरी चारवटा जंक्शन पनि विकास गरिएको छ । फलस्वरूप १२,००० बाट प्रतिघण्टा १६,००० सवारी साधन धान्ने सडकको क्षमता बढेको छ ।

त्यस्तै  तीन किलोमीटर साइकल लेन र १५ किलोमीटर फुटपाथको पनि निर्माण गरिएको छ ।