क्रोएसिया पहिलो पटक विश्वकपको फाइनलमा, पाँचौँ मिनेटमै अग्रता लिएर पनि हार्यो इंग्ल्याण्ड

विश्वकप फुटबलको उपाधिका लागि क्रोएसिया र फ्रान्स भिड्ने भएका छन् । बुधवार राती इंग्ल्याण्डलाई २-१ ले पराजित गर्दै क्रोएसियाले फ्रान्ससँग उपाधि भिडन्त पक्का गरेको हो। इंग्ल्याण्डले भने अब तेस्रो स्थानको लागि बेल्जियमसँग खेल्नेछ।

खेल सुरु भएको पाँचौ मिनेटमै गोल खाँदै पछि परेको क्रोएसियाले दोस्रो हाफमा बराबरी गोल गरेको थियो । निर्धारित ९० मिनेटको खेल बराबरीमा सकिएपछि ३० मिनेटको अतिरिक्त समयको १९औँ मिनेटमा मान्डुकिचले पेरिसिकको पासमा गरेको गोलनै निर्णायक गोल भयो ।

२० वर्षअघि फ्रान्ससँगै सेमिफाइनलमा पराजित भएको क्रोएसिया अब त्यही फ्रान्स सँग पहिलो पटक विश्वकप उपाधि जित्ने लक्ष्यका साथ आगामी आइतवार लुजनिकी स्टेडियममै फाइनल खेल्दैछ।