च्याम्पियन्स लिगको उपाधि रियल म्याड्रिडलाई
क्रिस्टियानो रोनाल्डो चम्किदा युरोपको सबैभन्दा प्रतिष्ठित च्याम्पियन्स लिगको उपाधि रियल म्याड्रिडले जितेको छ।
हिजो राती सम्प्न्न फाईनल भिडन्तमा रोनाल्डोको २ गोलको मद्धतमा इटालियन क्लब युभेन्ट्सलाई ४–१ ले पराजित गर्दै रियल म्याड्रिडले उपाधि जितेको हो ।
वेल्सको कार्डिफमा आइतबार बिहान सम्पन्न फाइनल खेलमा रोनाल्डोले २० र ६४ मिनेटमा गोल गरेपछि इटालीका सबैभन्दा अनुभवी गोलरक्षक जियानलुइगी बुफोनको टोली स्तब्ध बन्न पुग्यो। पहिलो हाफको खेललाई १–१ गोलको बराबरीमा राखेको युभेन्ट्सको रक्षापंक्तिलाई दोस्रो हाफमा म्याड्रिडका खेलाडीले सहजै तोडेका थिए।
जिनेदिन जिदानको प्रशिक्षणमा रियलको यो लगातार दोस्रो च्याम्पियन्स लिगको उपाधि हो। उनको प्रशिक्षणमा दुई साताअघि मात्र रियलले आफ्नो चिरप्रतिद्वन्दी बार्सिलोनासँग स्पेनिस ला लिगाको उपाधि पनि खोसेको थियो।
रियलको फाइनल जितमा रोनाल्डो पुनः नायक सावित भए। उनले खेलको २० मिनेटमा डानी कार्भाहालको पासमा गोल गर्दै रियललाई सुरुमै अग्रता दिलाएका थिए। तर, उनको यो अग्रता धेरै बेर टेक्न सकेन। २७ मिनेटमा मारियो मान्डजुकिकले १५ यार्ड टाढाबाट गोल गर्दै पहिलो हाफको खेललाई १–१ को बराबरीमा राख्न योगदान गरे।
तर, दोस्रो हाफपछि झनै संगठित देखिएको रियलले युभेन्ट्सको चट्टान झै मानिएको रक्षापंक्तिलाई तोड्दै ३ गोल फर्कायो। यसै क्रममा युभेन्ट्सले ८४ मिनेटमा जुवान कुआर्डाडो दोस्रो पहेँलो कार्ड खाँदै मैदानबाट बाहिरिए।
रियल म्याड्रिडको यो समेत १२ औं च्याम्पियन्स लिग उपाधि थियो। रियलको जितसँगै ३९ वर्ष १ सय २६ दिनको पाको उमेरमा च्याम्पियन्स लिग जित्ने युभेन्ट्सका कप्तान तथा गोलरक्षक जियान लुइगी बुफोनको सपना पनि चकनाचुर भयो।
