विश्वकप नोभेम्बर २० देखि डिसेम्बर १८ सम्म हुने

फिफा विश्वकप २०२२ नोभेम्बर २० देखि सुरु हुने पक्का भएको छ ।

फिफाले गरेको पछिल्लो निर्णयअनुसार उद्घाटन खेलमा आयोजक कतारले एक्वेडरसंग बेलुका ७ बजे खेल्नेछ ।

उद्घाटन खेलमा आयोजक राष्ट्रले खेल्ने पछिल्लो विश्वकपहरुमा चल्दै आएको परम्परा अनुसार फिफा काउन्सिलको ब्यूरोले सो निर्णय गरेको बताएको छ ।

त्यस्तै २१ तारिक दिउँसो १ बजे हुने भनिएको सेनेगल र नेदरल्यान्डबीचको खेल सोही दिन बेलुका ७ बजेको लागि सारिएको छ । फिफाले यस निर्णयबारे सम्पुर्ण दर्शकलाई इमेल मार्फत पनि जानकारी दिने बताएको छ । अन्य तोकिएको खेलहरु भने फेरबदल गरिएको छैन । प्रतियोगिताको समापन खेल डिसेम्बर १८ मा कतारको राष्ट्रिय दिवसको दिन पारेर हुनेछ ।

विश्वकपकै बेलामा कतारले देशभरका मुख्यतया स्थानमा थुप्रै साङितिक तथा सांस्कृतिक कार्यक्रमको घोषणा गरिसकेको छ ।