भरतपुर अस्पतालमा चोरको बिगबिगी, कर्मचारी नै चोरीमा संलग्न

चितवन, कार्तिक ०३-

भरतपुरका अस्पतालमा चोरको बिगबिगी बढ्दै गएको छ । अस्पतालको ओपिडि, आइसियू वार्डमा बिरामी कुर्न बसेका कुरूवाहरूको मोवाइल, नगद पैसाका साथै अस्पताल प्रशासनका जिन्सी सामाग्री समेत चोरी हुने गरेको हो । अस्पताल प्रशासनका अनुसार चोरीका घटनाको उजुरी दैनिक तीन देखि चार वटा आउने गरेका छन् ।

‘यस अस्पतालमा चोरीका घट्ना भइरहेका छन्,’ भरतपुर अस्पतालका सूचना अधिकारी गोपाल पौडेलले भने ‘हामी कहाँ मोवाईल र पकेटक मारको उजुरी दैनिक चारवटा सम्म आउने गरेको छ ।’ यसरी बिरामीको सामान र अस्पतालको जिन्सी सामाग्री चोर्नेमा अस्पतालकै कर्मचारी समेत रहेका छन् ।

भरतपुर अस्पतालले १५ दिन अगाडि अस्पतालकै कर्मचारीले मोवाईल चोरेको भेटाएको थियो । करारमा रहेका ती कर्मचारीलाई निस्कासन समेत गरिएको अस्पतालका प्रमुख प्रा.डा.कृष्णप्रसाद पौडेलले जानकारी दिए । यसरी कर्मचारी नै चोरीमा संलग्न भेटिएपछि अस्पताल परिसर असुरक्षित बन्दै गएको छ ।

‘बिरामी लिएर आउँदा मानिसहरुमा तनाव हुन्छ, चोरहरुले झोलाबाट समेत मोवाईल पैसा झिक्ने गर्दछन्’, भरतपुर अस्पतालमा आएका शिवनगरका हेमबहादुर गुरुङले भने ‘अघिल्लो वार्डमा बिरामी कुरीरहेको समयमा मेरो समेत पाँच हजार रुपैयाँ हराएको थियो ।’ बिरामी कुरुवाहरुसंग बिरामीको उपचार गर्न ल्याएको पैसा हुन सक्ने आशंकाले चोरहरुले झोलाबाट पैसा झिने गरेका छन् ।

अस्पतालमा सिसिटिभी क्यामरा सञ्चालन गरिएपनि चोरी नियन्त्रण हुन सकेका छैनन् । अस्पतालका भित्ताभित्तामा तपाई सिसिटिभी क्यामराको निगरानीमा हुनुहुन्छ भनेर लेखिएपनि बिरामी र कुरुवाको सामान सुरक्षित छैन ।
अस्पताल प्रशासनकै जिन्सी सामाग्री समेत कर्मचारीले बोकेर घर लैजाने गरेको पाईएको छ । दशैँ ताका आखाँ विभागमा कार्यरत छैटौँ तहका प्यारामेडिक्स कर्मचारीले अस्पतालको म्याटेस समेत चोरेर लगेको पुष्टि भएको छ । अस्पताल स्रोतका अनुसार, उनले आफ्नो मेडिकलमा अस्पतालको सामान लगेको अवस्थामा फेला परेको हो । स्थायी कर्मचारी रहेका उनलाई प्रशासनले २० हजार रुपैयाँ जरिवाना समेत तिराएको छ । तर, चोरी जस्तो जगन्य अपराधलाई अस्पतालले सामान्य रुपमा लिएको छ ।

भरतपुर अस्पतालका सुपरभाइजर अजय सुवेदीले चोरहरुलाई समातेर प्रहरीलाई समेत बुझाउने गरेको बताएका छन् । ‘अस्पतालमा केही एचआईभि, र टिभि जस्ता रोग भएका व्यक्तिसमेत सामेल भएको भेटाएका छौँ’, उनले भने ‘उनीहरुलाई पक्रेर चारपाटे मोडेर पनि हिडाएका छौँ तर, चोरीका घटना घटेका छैनौँ ।’ अस्पताल सार्वजनिक स्थान भएकाले पनि चोरी नियन्त्रण गर्न कठिन भएको उनको भनाई छ ।

भरतपुर अस्पतालमा चोरी भएका घट्नाको उजुरी जिल्ला प्रहरी कार्यालय चितवन समेत आउने गरेको प्रहरी नायव उपरिक्षक भेषराज रिजालले जानकारी दिए । ‘भरतपुर अस्पतालमा हाम्रो प्रहरी यूनिट समेत छ । त्यहाँबाट कहिले काही उजुरी आउने गरेका छन् तर, काठमाण्डौँका अस्पतालमा जस्तो होइन यहाँ सामान्य नै छ’, उनले भने ।

यस समाचारको श्रोत : www.narayanionline.com हो ।