प्लेअफमा पुगेपछि रोहितले भने- प्रमाणित गर्नुपर्ने दबाब थियो, गर्यौँ
काठमाडौं,मंसिर १९-
लुम्बिनी लायन्सका कप्तान रोहित पौडेलले आफ्नो टिम प्लेअफमा पुगेको यो सफलता भावुक क्षण रहेको बताएका छन् । शुक्रबार नेपाल प्रिमियर लिग (एनपीएल)मा जनकपुर बोल्ट्समाथि जितसँगै लुम्बिनी प्लेअफमा पुगेको छ । खराब नतिजा आइरहँदा पनि टोलीप्रति विश्वास थियो र आज महत्त्वपूर्ण क्षणमा सबैले राम्रो गर्दा सफलता मिल्यो,उनले भने ।
रोहितले गत सिजन लिगको अन्तिम रहेकाले यसपल्ट आफूहरूलाई प्रमाणित गर्नुपर्ने दबाब रहेको बताए । प्रतियोगिता अप एन्ड डाउन भइरहेको पनि उनले उल्लेख गरे । तर, खराब नतिजापछि पुनरागमन गर्नुले टोलीमा राम्रो आत्मविश्वास देखिएको उनको भनाइ छ ।
आजको खेलमा जेजे स्मित, डार्सी र डिकवेलले ब्याटिङमा र बलिङमा पनि राम्रो भएको कप्तान रोहित बताउँछन् । उनले यही आत्मविश्वास लिएर प्लेअफमा खेल्ने लक्ष्य राखेका छन् । सहज रूपमा खेल जित्नुपर्ने भए पनि सन्दीप जोरा र आफ्नो विकेटपछि टोलीमा दबाब परेको उनको भनाइ छ । तर, स्मितको सटले खेलमा फर्किएको उनले उल्लेख गरे ।
फिल्डमा जनकपुर असहज हुँदा पनि आफूहरूलाई सहज भएको उनी बताउँछन् । क्षमता अनुरूप ब्याटिङमा गर्न सके प्लेअफ सुखद बन्ने उनको विश्वास छ । तर, बलिङमा पनि राम्रो भइरहेको र त्यही लय जारी रहँदा सहज हुने कप्तान रोहितको आशा छ ।
नकआउट खेलमा दुवै टोलीमा समान दबाब हुने र जसले त्यसलाई सहज रूपमा सामना गर्न सक्छ त्यसले नै जित्नको कप्तान उनको भनाइ छ । उनले प्लेअफमा पुग्ने टोलीमध्ये लुम्बिनी नै सबैभन्दा बलियो रहेको दाबी गरेका छन् ।