शिव परियारको जनचेतना मुलक गीत ‘नभन मेरो भाग्य’ सार्वजनिक

मस्तिष्क पक्षघात सम्बन्धि जनचेतना मुलक गीत ‘नभन मेरो भाग्य’को विमोचन गरिएको छ । परराष्ट्रमन्त्री प्रदिप कुमार ज्ञवालीले गीतको विमोचन गरे ।

अहिलेका चर्चित गायक शिव परियारको स्वर तथा नरेश कुमार प्रधानको शब्द रहेको सार्वजनिक गीतमा रिदम कँडेलको संगीत तथा एरेन्ज रहेको छ । गीतको रेकर्डिस्ट महेश्वरमान राजभण्डारी रहेका छन् भने गीतलाई साउन्ड मिल रेकर्डिङ स्टुडियोमा रेकर्ड गरिएको हो । गीतमा अभिनेता सरोज खनाल, सुर्य माला खनाल तथा बाल कलाकार श्रीवानी थापा र रुपेश लामाले अभिनय गरेका छन्।

गीतको भिडियोलाई निकेश खड्काले निर्देशन गरेका हुन् । बुद्ध थापाले छायांकन गरेको यस गीतलाई विकास धमलाले सम्पादन गरेका हुन् ।
गीतलाई साउन्ड मिलको अफिसियल युट्युब मार्फत सार्वजनिक गरिएको छ ।

मस्तिष्क पक्षघात समाजकी अध्यक्ष उर्मिला श्रेष्ठको अध्यक्षतामा भएको गीत सार्वजनिक कार्यक्रममा काठमाडौं महानगरपालिकाकी उपमेयर हरि प्रभा खड्गी श्रेष्ठ, अभिनेता सरोज खनाललगायतको उपस्थिति रहेको थियो । यस्तै गायक शिव परियारले मस्तिष्क पक्षघात समाजलाई नगद दश हजार एक रुपैयाँ सहयोग गरेका छन् । समाजसेवी नरेन्द्र बहादुर श्रेष्ठले नगद २१ हजार रुपैयाँ सहयोग गरेका थिए ।