कतारमा हाउसफुल “कबड्डी कबड्डी कबड्डी”
नेपालमा ५१ दिन मनाउन सफल चलचित्र ‘कबड्डी कबड्डी कबड्डी’ को कतारमा पनि सफल प्रदर्शन भएको छ । बिहिबार देखि द मल र एसियन टाउन सिनेमा घरमा प्रदर्शनमा आएको यस चलचित्रलको हिजो सबैजसो शो हाउसफुल रह्यो । कथावस्तु राम्रो भएकाले नै दर्शकले पनि चलचित्रलाई राम्रो प्रतिक्रिया दिए ।
“धेरै समय पश्चात् कतारको सिनेमा हलमा नेपाली चलचित्र हाउसफुलका साथ प्रदर्शन हुँदा खुशी छौँ । नेपाली चलचित्रलाई माया गरेर हेर्न आउने सबै दर्शकलाई धन्यवाद भन्न चाहान्छौ ,” आयोजकद्वय प्रमुख दिपक भण्डारी र निमा भुसालले बताए ।
सुरुमा एक भन्दा बढी पायक शो दिन नमानेको सिनेमा घरहरुले दर्शकको चाप देखेर हिन्दी फिल्म ‘मरजावन’ नै हटाएर कबड्डी कबड्डी कबड्डी लाई एक दिनमै चार शो दियो । राम्रो प्रदर्शन गरेपछि फिल्म आज शनिबार पनि द मलमा दिउँसो २,४:३०,६:३० बजे र एसियन टाउन सिनेमामा राती ११:३० बजे प्रदर्शन हुँदैछ ।
फिल्मले स्वजातिय विवाह र अन्तर्जातिय प्रेम सम्बन्धको अन्तरद्वन्द्वको कथालाई पर्दामा उतारेको छ । ‘कबड्डी कबड्डी कबड्डी’ मा दयाहाङ राई, उपासना सिंह ठकुरी, कर्मा शाक्य, विल्सन विक्रम राई, बुद्धि तामाङ, रिश्मा गुरुङ, कमलमणी नेपाल, माओत्से गुरुङ, विजय बराललगायतका कलाकारहरुको मुख्य अभिनय छ भने फिल्मलाई शैलेन्द्र डि. कार्कीले खिचेका छन् ।
