कोरोना भाइरस : १६६६ जनाको मृत्यु, संक्रमणदर झन बढ्दै
चीनको वुहान सहरबाट फैलिएको कोरोना भाइरसको संक्रमणदर बढ्दै गएको छ ।
चीन सरकारले भाइरसको महामारी नियन्त्रणका लागि अनेकौं प्रयास गरेता पनि नियन्त्रणमा कुनै कमी नआएको विभिन्न संचारमाध्यमहरुले बताएका छन् । चीन लगायत विश्वभर आइतवार विहानसम्म कोरोना भाइरसको संक्रमणबाट १ हजार ६६६ जनाको मृत्यु भएको छ ।
चिनियाँ संचारमाध्यम सीजीटीएनका अनुसार भाइरसको संक्रमणबाट चीनमा ६८ हजार ५०० जना संक्रमित भएका छन् ।
चीनको राष्ट्रिय स्वास्थ्य आयोगलाई उद्धृत गर्दै समाचार एजेन्सी सिन्ह्वाले आइतवार उल्लेख गरे अनुसार विभिन्न प्रान्तमा कोरोना भाइरसको संक्रमणबाट शनिवारमात्रै १४२ जनाको मृत्यु भएको छ भने २ हजार ९ जना नयाँ संक्रमित विरामी फेला परेका छन् ।
यसैवीच चीनका राष्ट्रपति सि चिन फिङले कोरोना भाइरसको संक्रमणलाई कम गर्नका लागि उपचारमा थप प्रभावकारी रुपले कार्य गर्न स्वास्थ्य अधिकारीहरुलाई आदेश दिएका छन् ।