कोरोना भाइरस : कतारमा अहिले सम्मकै उच्च संक्रमित भेटिए

आज नयाँ ७६१ जनामा कोरोना भाइरस (कोभिड-१९) संक्रमण देखिएको र ५९ जनालाई निको भएको स्वास्थ मन्त्रालयले जनाएको छ । यो संगै कतारमा भाइरस संक्रमितको संख्या ८,५२५ पुगेको छ ।

हालसम्म ८०९ जना निको भएर घर फर्किएका छन् ।त्यस्तै जम्मा  ७७०६ जना उपचारत छन् । आज सम्म ७५८८८ जनालाई जाँच गरिएको मन्त्रालयले बताएको छ । भाइरसका कारण हालसम्म कतारमा १० जनाको मृत्यु भएको छ ।

आज थपिएका बिरामीहरु क्वारेन्टाइनमा बसेका र केही नयाँ व्यक्तिहरु हुन् जसमध्ये धेरैजसो आप्रवासी नागरिक रहेका छन् । सरकारले कुन देशका कति मानिसमा संक्रमण देखिएको तथ्यांक सार्वजनिक भने गरेको छैन ।

कतार लगायत खाडी मुलुकमा भाइरसको स्थिति उत्कर्षमा पुगेको र आउने दिनमा संक्रमितको संख्या अझै बढ्ने स्वास्थ्य मन्त्रालयले जनाएको छ ।