कतारले २०३० को एसियन गेम्स आयोजना गर्ने

कतारले सन् २०३० को एसियन गेम्स आयोजना गर्ने भएको छ । ओमानको राजधानी मस्कटमा आयोजित बोलीमा कतारले साउदी अरेबियालाई पछि पार्दै प्रतियोगिताको २१ औं संस्करण आयोजना गर्ने जिम्मा पाएको हो ।

एसियन ओलम्पिक काउन्सिलका अध्यक्ष शेख अहमद फहाद अल अहमद अल सबाहले अनलाइन मतदान प्रक्रिया पछि दोहाको पक्षमा निर्णय गरेका थिए । रियादले भने २०३४ को प्रतियोगिता आयोजना गर्ने जिम्मा पाएको छ ।

कतारले यसअघि पनि एसियन खेल प्रतियोगिता आयोजना गरिसकेको छ । सन् २००६ मा दोहामा आयोजित प्रतियोगितामा १० हजार बढी खेलाडी र मिडियाकर्मीको उपस्थिति रहेको थियो ।

सन् २०२२ को प्रतियोगिता चीनले र २०२६ को प्रतियोगिता जापानले आयोजना गर्नेछ ।