कतारले २२ रियालको नोट जारी गर्यो

कतारको राष्ट्रिय बैंकले २२ रियालको नोट जारी गरेको छ ।

राष्ट्र बैंकले फिफा र सुप्रिम कमिटी फर डेलिभरी एन्ड लिगेसीसंगको समन्वयमा आज विश्वकप विशेष नोट र सिक्का सार्वजनिक गरेको हो।

नोट र सिक्कामा विश्वकपको लोगो,ट्रफी,लुसेल र अल बायत रंगशाला, राष्ट्रिय चिन्ह लगायत समावेश गरिएको छ ।

विश्वकप जस्तो एतिहासिक कार्यक्रमको सफल आयोजनाको निमित्त बैंकिङ क्षेत्रले नयाँ मुद्रा मार्फत योगदान गरेको राष्ट्र बैंकका गभर्नर शेख बन्दर बिन मोहम्मद बिन साउद अल थानीले बताएका छन् ।

नयाँ मुद्राले कतारको फुटबल इतिहासलाई प्रतिनिधित्व गरेको छ । नोट र सिक्का विश्वकप दर्शक र स्थानीयले बैंक तथा एक्सचेञ्ज हाउस मार्फत ७५ रियालमा खरिद गर्न सकिने राष्ट्र बैंकले बताएको छ ।