आज विश्वकप उपाधिका लागि अर्जेन्टिना र फ्रान्स खेल्दै
फिफा विश्व कप फुटबलको उपाधिका लागि आज अर्जेन्टिना र फ्रान्स खेल्दैछन् । खेल कतारको लुसेल मैदानमा साँझ ६ बजे नेपालको समय अनुसार आज राति पौने ९ बजे सुरु हुनेछ ।
अर्जेन्टिना पहिलो सेमिफाइनलमा क्रोएसियालाई ३–० गोलले र फ्रान्स दोस्रो सेमिफाइनलमा मोरक्कोलाई २–० गोलले पराजित गरी फाइनलमा पुगेका हुन्। यी दुई देश पहिलो पटक विश्व कपको फाइनलमा खेल्न लागेका छन् । फ्रान्स विश्व कपको साविक विजेता टोली पनि हो । त्यस्तै विश्व कपमा ८ वर्षपछि फाइनल पुगेको अर्जेन्टिना सन् १९८६ पछि विश्व कपको उपाधि जित्ने सुरमा छ ।
सन् २०१४ मा अर्जेन्टिना फाइनलमा जर्मनीसँग अतिरिक्त समयमा पराजित भएको थियो । अर्जेन्टिनाका कप्तान ३५ वर्षका लिओनल मेस्सीका लागि यो अन्तिम विश्व कप हो । उनकै नेतृत्वमा अर्जेन्टिनाले गएको वर्ष कोपा अमेरिकाको उपाधि समेत जितेको थियो ।
अर्जेन्टिनाले सन् १९७८ र १९८६ मा तथा फ्रान्सले सन् २०१८ र १९९८ मा विश्व कपको उपाधि जितेका थिए । यसपालि जितेमा फ्रान्सले लगातार दोस्रो पटक जितेर उपाधि रक्षा गर्नेछ । साथै लगातार उपाधि जित्ने दोस्रो देश पनि बन्नेछ ।
विश्वकप फाइनल खेलका रेफ्री पोल्यान्डका मार्चिनियाक
पोल्यान्डका सायमन मार्चिनियाकले आइतबार हुने कतार फिफा विश्वकपको फाइनल खेल खेलाउने भएका छन् । ४१ वर्षीय पहिलो पोलिस रेफ्री मार्चिनियाकलाई सहायक रेफ्रीका पावल सोकोल्निकी र तोमाज लिस्टकिले सहयोग गर्नेछन् ।
विश्वकप विजेताले ४२ मिलियन अमेरिकी डलर पाउने
कतारमा विश्वकपको विजेताले अहिलेसम्मकै सबैभन्दा धेरै ४२ मिलियन अमेरिकी डलर पाउनेछन् । । सन् २०१८ मा फ्रान्सले पाएको विश्वकपको पुरस्कार भन्दा कतारको ४ मिलियन धेरै हो ।
अब बन्ने विश्वकप विजेताले पाउने रकम कतारी रियालमा हिसाब गर्दा करिब १५ करोड २९ लाख ११ हजार ५०० रियाल हुन्छ । यस्तै उपविजेताले ३० मिलियन डलर अर्थात् कतारि रियाल १० करोड ९२ लाख २२ हजार ५०० पाउनेछन् ।
