लाहोरमा खतरनाक वायु गुणस्तरका कारण प्राथमिक विद्यालयहरू एक हप्ताका लागि बन्द

पाकिस्तान, कात्तिक १९-

सप्ताहन्तमा वायु–गुणस्तर सूचकाङ्क रेकर्ड उच्च विन्दुमा पुगेपछि सोमबार खतरनाक रूपमा खराब वायु गुणस्तरका कारण पाकिस्तानी अधिकारीहरू सांस्कृतिक राजधानी लाहोरमा एक हप्ताका लागि प्राथमिक विद्यालयहरू बन्द गर्न बाध्य भएका छन् ।

एक करोड ४० लाख जनसङ्ख्या भएको लाहोर शहरमा बालबालिकालाई श्वासप्रश्वाससम्बन्धी र अन्य रोगहरूबाट जोगाउने बृहत्तर प्रयासको हिस्साका रूपमा लाहोरमा यी कदम चालिएका हुन् । सरकारले लाहोरमा सबैले मास्क लगाउनु अनिवार्य भएको बताएको छ ।

शहरमा ‘हरित लकडाउन’ को हिस्साका रूपमा ५० प्रतिशत कर्मचारीले पनि घरबाटै काम गर्नुपर्ने सरकारले बताएको छ । साथै फिल्टरबिना बार्बेक्यू गर्न प्रतिबन्ध लगाइएको छ र मोटरचालित रिक्साहरूलाई सीमित गरिएको छ । विवाह हलहरू राति १० बजे बन्द गर्नुपर्नेछ । प्रदूषणसँग लड्न कृत्रिम वर्षाको प्रयोग गरिने सम्भावना रहेको छ ।

सप्ताहन्तमा लाहोरमा वायु–गुणस्तर सूचकाङ्क एक हजार नाघेको छ । यो पाकिस्तानमा रेकर्ड उच्च हो ।

भारतसँग सीमा जोडिएको पूर्वी पञ्जाब प्रान्तको राजधानी लाहोरमा गत महिनादेखि वायु गुणस्तर बिग्रन थालेपछि विषाक्त खैरो धुवाँले दशौँ हजार मानिस, मुख्यतया बालबालिका र वृद्धवृद्धाहरूलाई बिरामी बनाएको छ । सरकारले केही क्षेत्रमा निर्माण कार्यमा पनि प्रतिबन्ध गरेको छ र धुवाँ उत्सर्जन गर्ने सवारी साधनका मालिकहरूलाई जरिवाना गरेको छ । सरकारी सूचनाअनुसार प्रदूषणका कारण विद्यालयहरू एक हप्ताका लागि बन्द रहनेछन् ।

पञ्जाब वातावरण संरक्षण विभागका अनुसार हावामा पिएम २।५ वा सूक्ष्म कणको मात्रा ४५० नजिक पुगेको छ र यसलाई खतरनाक मानिन्छ । लाहोर एक समय बगैँचाहरूको शहरका रूपमा चिनिन्थ्यो र यो १६औँ देखि १९औँ शताब्दीसम्मको मुगल कालमा सर्वव्यापी थियो । यद्यपि द्रुत शहरीकरण र जनसङ्ख्या वृद्धिले हरियालीका लागि थोरै ठाउँ मात्र छोडेको छ ।

यस समाचारको श्रोत : www.narayanionline.com हो ।