निराशालाई आशामा बदल्न सरकार जनअपेक्षाअनुसार चल्नुपर्छः कांग्रेस नेता महर

डडेल्धुरा, कात्तिक २३-

नेपाली कांग्रेसका नेता नैनसिंह महरले जनतामा छाएको निरासालाई आशामा बदल्न सरकार जनअपेक्षाअनुसार चल्नुपर्ने बताउनुभएको छ ।

नेपाली कांग्रेस डडेल्धुराले आज यहाँ आयोजना गरेको कार्यक्रममा उहाँले सय दिने अवधिमा गरेका कामको समीक्षा गर्दै संसद्का दुई ठूला पार्टी मिलेर बनेको सरकारको औचित्य पुष्टि हुने गरी काम गर्नुपर्नेमा जोड दिनुभयो । “सरकारको सफलता र असफलतासँग कांग्रेसको प्रतिष्ठा जोडिएको छ । त्यसैले जनसन्तुष्टिका लागि काम गर्नुको विकल्प छैन”, नेता महरको भनाइ थियो ।

पार्टी शिक्षा विभाग प्रमुखसमेत रहनुभएका केन्द्रीय सदस्य महरले संविधानमा लेखिएको निःशुल्क स्वास्थ र शिक्षा प्राप्त गर्ने जनताको हक कार्यान्वयन गराउन देशका एक सय ६५ वटै निर्वाचन क्षेत्रमा कांग्रेसले मङ्सिर पहिलो हप्तादेखि विमर्श अभियान सुरु गर्ने जानकारीसमेत दिनुभयो । रासस

यस समाचारको श्रोत : www.narayanionline.com हो ।