दासढुंगामा ट्रक र बोलेरो ठोक्किँदा एक जनाको मृत्यु, एक गम्भीर घाइते

चितवन, मंसिर २८-

नारायणगढ–मुग्लिन सडकअन्तर्गत दासढुंगामा गएराति खाली ट्रक र कुखुरा बोकेको बोलेरो आपसमा ठोक्किँदा एक जनाको मृत्यु भएको छ भने एक जना गम्भीर घाइते भएका छन् ।

पोखराबाट नवलपरासीतर्फ आउदै गरेको बागमती प्रदेश०३–००१ ख २५२४ नम्बरको खाली ट्रक र चितवनबाट काठमाण्डौतर्फ जादै गरेको बागमती प्रदेश०१–०३१ च ०११३ नम्बरको कुखुरा बोकेको बोलेरो बिहीवार राति ११ः४० बजे एकआपसमा ठोक्किएका थिए ।

ट्रकको ठक्करबाट बोलेरोमा सवार उदयपुरका अन्दाजी ३६ वर्षीय भिम कटुवालको चितवन मेडिकल कलेजमा उपचारको क्रममा गएराति साढे १२ बजे मृत्यु भएको जिल्ला प्रहरी कार्यालय चितवनले जानकारी दिएको छ । गम्भीर घाइते भएका बोलेरो चालक दोलखा घर बताउने अन्दाजी २६ वर्षीय राम तामाङको उपचार भइरहेको छ । उनको टाउको, छाती र अनुहारमा चोट लागेको प्रहरीले बताएको छ ।

ट्रक चालक रौतहट चन्द्रपुर नगरपालिका–६ बस्ने वर्ष २४ को सन्तोष चौधरीलाई प्रहरीले नियन्त्रणमा लिएको छ ।

यस समाचारको श्रोत : www.narayanionline.com हो ।