दूतावासले गणतन्त्र दिवस मनायो
कतारस्थित नेपाली राजदूतावासले ११ औं गणतन्त्र दिवस हिजो एक कार्यक्रमको आयोजना गरी मनाएको छ। कतारका लागि नेपाली राजदूत महामहिम प्रा. रमेश प्रसाद कोइरालाले झन्डोत्तोलन र राष्ट्रिय गान बाट शुरु गरिएको कार्यक्रममा नेपाली कलाकारहरुले सांस्कृतिक नृत्य समेत प्रस्तुत गरेका थिए ।
१० वर्ष पहिले नेपाल गणतान्त्रिक मुलुक घोषणा भएको स्मरण गर्दै राजदूत कोइरालाले यसका लागि बलिदान गर्नुभएका ज्ञात-अज्ञात सहिदहरुप्रति सम्मान व्यक्त गर्नुभयो । उहाँले २४० वर्ष लामो राजतन्त्र/केन्द्रीकृत शासन प्रणाली समाप्त भई हाल साँचो अर्थमा जनताको सरकार स्थापित भएको बताउनु भयो ।उहाँले गणतन्त्रकै माध्यमबाट नेपालको विकास तथा शान्तिको संस्थाकरण गर्ने क्रममा नेपालको संविधान २०७२ जारी भएको स्मरण गर्दै संविधानको प्रस्तावनामा प्रतिस्पर्धात्मक बहुदलीय लोकतान्त्रिक शासन प्रणाली, नागरिक स्वतन्त्रता, मानव अधिकार, आवधिक निर्वाचन, पूर्ण प्रेस स्वतन्त्रता, निष्पक्ष र सक्षम न्यायपालिका, कानूनी राज्यको अवधारणा, दिगो शान्ति र सुशासनलाई अंगीकार गरिएको र समानता, संबृद्धि तथा सामाजिक न्यायको माध्यमद्धारा समावेशिता तथा सहभागिताको सिद्धान्तको आधारमा समानुपातिक समतामूलक समाज निर्माण गर्ने दिशामा अग्रसर भएको बताउनु भयो।
कतारमा रहेका नेपाली समुदायलाई उनीहरुले गरेका योगदान तथा कल्याणकारी कार्यहरुको लागि धन्यवाद ज्ञापन गर्नुहुँदै राष्ट्र र राष्ट्रियतालाई सर्वोपरी राखी आफ्ना कार्यहरु गर्न राजदूतले आग्रह गर्नुभयो । उहाँले सबैलाई नेपाल सरकारको ‘समृद्ध नेपाल, सुखी नेपाली’ मूलनाराका साथ शान्त, समृद्ध एवम् विकसित नेपाल निर्माणमा एकबद्ध भएर लाग्नुपर्ने आजको आवश्यकता रहेको बताउनु भयो ।
कार्यक्रममा कतारमा स्थापित नेपाली समुदायका प्रतिनिधिहरू, महिला, डाक्टर, इन्जिनियर, प्रोफेसर लगायत विभिन्न पेशाकर्मी, व्यवसायी एवम् श्रमिकहरु तथा पत्रकारहरू समेतको उपस्थिती रहेको थियो। उक्त अवसरमा नेपाली समुदायका प्रतिनिधिहरूबाट गणतन्त्र दिवसका अवसरमा शुभकामना आदान-प्रदान भएको थियो। कार्यक्रमको अन्त्यमा, राजदूतावासमा रात्रिभोज आयोजना गरिएको थियो । गणतन्त्र दिवसको अवसरमा जेठ १४, १५ र १६ गते राजदूतावासमा दिपावली कार्यक्रम समेत राखिएको छ ।