कतारमा रहेका नेपालीहरूका लागि राजदूतावासको विशेष अनुरोध

दोहा, कतार – मध्यपूर्वमा विकसित पछिल्लो विशेष परिस्थितिलाई मध्यनजर गर्दै कतारस्थित नेपाली राजदूतावासले त्यहाँ रहेका सम्पूर्ण नेपाली नागरिकहरूका लागि एक विशेष सतर्कता सूचना जारी गरेको छ। राजदूतावासले नेपाली दिदीबहिनी तथा दाजुभाइहरूलाई सुरक्षा संवेदनशीलता बुझेर संयमित हुन र स्थानीय प्रशासनको निर्देशन पालना गर्न अनुरोध गरेको छ।

सुरक्षाका लागि राजदूतावासको ११ बुँदे निर्देशन:

राजदूतावासले जारी गरेको सूचनामा निम्न मुख्य कुराहरू उल्लेख गरिएका छन्:

• आधिकारिक सूचना मात्र विश्वास गर्ने: कतारी आधिकारिक निकायहरूबाट आउने समाचार र निर्देशनहरूलाई मात्र पछ्याउनुहोला।

• हवाई उडान: कतारी हवाई क्षेत्र (Airspace) खुलेपछि मात्र नियमित उडान सुचारु हुने भएकाले अपडेटका लागि ‘Qatar Civil Aviation Authority’ को वेबसाइट हेर्न आग्रह गरिएको छ।

• सामाजिक सञ्जालमा सावधानी: अफवाह फैलाउने खालका सामग्री वा घटनास्थलका तस्विर र भिडियोहरू सामाजिक सञ्जालमा शेयर नगर्न भनिएको छ।

• घरभित्रै बस्न सुझाव: अत्यावश्यक कामबाहेक भीडभाड हुने ठाउँमा नजान र सुरक्षित साथ घरभित्रै बस्न भनिएको छ। साथै, घरमा बस्दा सिसा, झ्याल वा बार्दलीको छेउमा नबस्न पनि सचेत गराइएको छ।

• तयारी अवस्थामा रहने: आफ्नो मोबाइल फोन सधैं पूर्ण चार्ज राख्न, केही नगद र महत्त्वपूर्ण परिचयपत्र (राहदानी, कतारी आईडी) साथमै राख्न राजदूतावासले सुझाएको छ।

• ठगीबाट जोगिनुहोला: हालको परिस्थितिको फाइदा उठाउँदै विभिन्न बहानामा फोन गरी व्यक्तिगत विवरण (बैँक खाता, एटीएम कार्ड, आईडी आदि) माग्ने ‘स्क्यामर’हरू सक्रिय हुन सक्ने भएकाले त्यस्ता विवरण कसैलाई नदिन चेतावनी दिइएको छ।

आपत्कालीन सम्पर्क नम्बरहरू:

कुनै पनि समस्या परेमा वा मेडिकल इमर्जेन्सी भएमा निम्न नम्बरहरूमा सम्पर्क गर्न सकिनेछ:

• नेपाली राजदूतावास, दोहा: +९७४ ४४६७ ५६८१ / +९७४ ६६२१ ४४१९

• प्रहरी/एम्बुलेन्स: ९९९

• हमाद जनरल हस्पिटल: +९७४ ४४३९ ४४४४

• कतार एयरवेज इमर्जेन्सी टिम: +९७४ ४१४४ ५५५५

• नेपाल एयरलाइन्स (Nepal Airlines): +९७४ ६६५६ ०८३३

• हिमालय एयरलाइन्स (Himalaya Airlines): +९७४ ५०७२ १७४९

राजदूतावासले कतारमा रहेका नेपालीहरूलाई आफ्नो परिवार र स्थानीय नेपाली समुदायसँग नियमित सम्पर्कमा रहन समेत अनुरोध गरेको छ।