मध्यपूर्व तनावबीच कतारले १४ मिसाइल र ४ ड्रोन आकाशमै नष्ट गर्यो
दोहो, कतारको हवाई प्रतिरक्षा प्रणालीले देशतर्फ प्रक्षेपण गरिएका १४ वटा मिसाइल र ४ वटा ड्रोनलाई सफलतापूर्वक अवरोध गरेको कतारी अधिकारीहरूले बताएका छन्। आक्रमणका क्रममा राजधानी दोहो आसपासका क्षेत्रमा ठूलो आवाजका विस्फोट सुनिएको बताइएको छ।
कतारको सुरक्षा निकायका अनुसार हवाई प्रतिरक्षा प्रणाली सक्रिय पारेर सबै मिसाइल र ड्रोनलाई आकाशमै नष्ट गरिएको हो। घटनापछि राष्ट्रिय आपतकालीन सन्देशमार्फत सुरक्षा खतरा समाप्त भएको र अवस्था सामान्य बन्दै गएको जानकारी पनि सार्वजनिक गरिएको छ।
यसअघि सुरक्षा अधिकारीहरूले नागरिकलाई सतर्क रहन र आवश्यक नभएसम्म घरबाहिर ननिस्कन आग्रह गरेका थिए। राजधानीका केही संवेदनशील क्षेत्रमा, विशेष गरी विदेशी कूटनीतिक कार्यालय आसपास, सावधानीका रूपमा अस्थायी सुरक्षा व्यवस्था कडा पारिएको थियो।
हाल मध्यपूर्व क्षेत्रमा बढ्दो सैन्य तनावका कारण कतारसहित खाडी क्षेत्रका विभिन्न देशहरू मिसाइल र ड्रोन आक्रमणको जोखिममा परिरहेका छन्। संयुक्त राज्य अमेरिका र इजरायलले इरानमाथि गरेको सैन्य कारबाहीपछि क्षेत्रीय तनाव तीव्र बनेको र त्यसको प्रतिक्रियास्वरूप इरानबाट खाडी देशहरूतर्फ आक्रमण भएको बताइएको छ।
कतारी सरकारले भने यस्ता आक्रमणलाई देशको सार्वभौमिकतामाथिको गम्भीर चुनौती भन्दै कडा शब्दमा निन्दा गरेको छ। साथै आवश्यक परे अन्तर्राष्ट्रिय कानुनअनुसार आत्मरक्षाको अधिकार प्रयोग गर्ने चेतावनी पनि दिएको छ।
यस घटनाले मध्यपूर्वमा जारी सैन्य तनाव अझ बढ्ने चिन्ता पैदा गरेको विश्लेषकहरूले बताएका छन्।