कतारमा भ्रामक भिडियो र सूचना फैलाएको आरोपमा ३१३ जना पक्राउ
दोहा- कतारको गृह मन्त्रालय (मिनिस्ट्री अफ इन्टेरियर) ले भ्रामक सूचना र अवैध भिडियो सामग्री प्रसारण गरेको आरोपमा ३१३ जनालाई पक्राउ गरिएको जनाएको छ। पक्राउ पर्नेहरू विभिन्न देशका नागरिक रहेका छन्।
मन्त्रालयका अनुसार आर्थिक तथा साइबर अपराध नियन्त्रण विभाग, जो अपराध अनुसन्धान महानिर्देशनालय अन्तर्गत कार्यरत छ, ले उनीहरूलाई नियन्त्रणमा लिएको हो। उनीहरूलाई अनुमति बिना भिडियो खिच्ने, ती भिडियो सामाजिक सञ्जाल वा अन्य माध्यमबाट प्रसारण गर्ने, झुटा वा भ्रामक सूचना र अफवाह फैलाउने तथा जनतामा अनावश्यक डर र चिन्ता उत्पन्न गराउने सामग्री प्रसार गरेको आरोप लागेको छ।
यस घटनामा संलग्न व्यक्तिहरू विरुद्ध आवश्यक कानुनी तथा प्रशासनिक कारबाही सुरु गरिएको मन्त्रालयले जनाएको छ।
गृह मन्त्रालयले जारी गरेको वक्तव्यमा वर्तमान परिस्थितिसँग सम्बन्धित भिडियो खिच्ने, प्रकाशन गर्ने वा अपुष्ट अफवाह फैलाउने कार्य नगर्न नागरिकलाई आग्रह गरिएको छ। साथै, सूचना प्राप्त गर्दा आधिकारिक स्रोतहरूबाट मात्र जानकारी लिन पनि आग्रह गरिएको छ।
मन्त्रालयले कानुन उल्लङ्घन गर्ने जो-कोहीविरुद्ध आवश्यक कानुनी कारबाही गर्न राज्यका सम्बन्धित निकायहरू पछि नहट्ने चेतावनी दिएको छ।