खाडी क्षेत्रमा रहेका ५४ हजारभन्दा बढी नेपालीले सरकारलाई विवरण उपलब्ध गराए
काठमाडौं – मध्यपूर्व क्षेत्रमा बढ्दो तनावका बीच खाडी मुलुकहरूमा बसोबास तथा रोजगारीमा रहेका ५४ हजारभन्दा बढी नेपालीले आफ्नो विवरण नेपाल सरकारलाई उपलब्ध गराएका छन्।
परराष्ट्र मन्त्रालयले विदेशमा रहेका नेपालीहरूको अवस्था बुझ्न र आपत्कालीन अवस्थामा आवश्यक सहयोग तथा उद्धारको तयारी गर्न अनलाइन प्रणालीमार्फत विवरण संकलन सुरु गरेको हो। मन्त्रालयका अनुसार हालसम्म ५४ हजार ७८६ जना नेपालीले आफ्नो विवरण दर्ता गरिसकेका छन्।
मध्यपूर्व क्षेत्रमा देखिएको सुरक्षा चुनौती र सम्भावित द्वन्द्वका कारण सरकारले खाडी क्षेत्रमा रहेका नेपालीहरूको वास्तविक अवस्था बुझ्न यस्तो विवरण संकलन सुरु गरेको जनाएको छ। दर्ता गरिएको जानकारीका आधारमा सरकारले आवश्यक परे सम्बन्धित देशका नेपाली दूतावासमार्फत समन्वय गरेर सहयोग र उद्धारको व्यवस्था गर्न सक्ने बताइएको छ।
अनलाइन प्रणालीमार्फत नेपालीहरूले आफ्नो नाम, बसोबास गरेको देश, कार्यस्थल, सम्पर्क विवरण र अन्य आवश्यक जानकारी उपलब्ध गराउने व्यवस्था गरिएको छ। यसले विदेशमा रहेका नेपालीहरूको अवस्थाबारे तत्काल जानकारी प्राप्त गर्न र समस्या परे छिटो प्रतिक्रिया दिन मद्दत पुग्ने अपेक्षा गरिएको छ।
परराष्ट्र मन्त्रालयले खाडी क्षेत्रमा रहेका सबै नेपालीलाई आफ्नो विवरण अनलाइन प्रणालीमा दर्ता गर्न र सम्बन्धित नेपाली दूतावाससँग सम्पर्कमा रहन आग्रह गरेको छ।
यदि तपाईंले अहिलेसम्म फारम भर्नुभएको छैन भने तलको लिंकमा क्लिक गरेर आफ्नो विवरण दर्ता गर्न सक्नुहुन्छ:
https://legal.nepalconsular.gov.np/urgent-rescue
कसरी गर्ने आपतकालीन पोर्टलमा विवरण दर्ता ?
खाडी मुलुकहरूमा लाखौँ नेपाली श्रमिक कार्यरत छन् र उनीहरूले पठाउने रेमिट्यान्स नेपाल अर्थतन्त्रको प्रमुख स्रोत मानिन्छ। सरकारले क्षेत्रीय सुरक्षा अवस्थालाई ध्यानमा राख्दै त्यहाँ रहेका नेपालीहरूको सुरक्षा र हित सुनिश्चित गर्न आवश्यक तयारी गरिरहेको जनाएको छ।