आज साँझ ‘अर्थ आवर’ : ८:३०–९:३० सम्म बत्ती निभाउन अपिल

दोहा, कतार सरकारले ‘अर्थ आवर २०२६’ को अवसरमा नागरिक तथा संस्थाहरूलाई एक घण्टा बत्ती निभाउन आह्वान गरेको छ। वातावरण संरक्षण तथा जलवायु परिवर्तनबारे जनचेतना फैलाउने उद्देश्यले यस्तो अपिल गरिएको हो।

कतारको वातावरण तथा जलवायु परिवर्तन मन्त्रालयले सामाजिक सञ्जालमार्फत जारी सन्देशमा आज (मार्च २८) बेलुका स्थानीय समयअनुसार ८:३० देखि ९:३० बजेसम्म अनावश्यक बत्ती तथा विद्युतीय उपकरण बन्द गर्न अनुरोध गरेको जनाएको छ।

अर्थ आवर विश्वव्यापी अभियान हो, जसअन्तर्गत हरेक वर्ष मार्च महिनाको अन्तिम शनिबार एक घण्टाका लागि बत्ती निभाएर वातावरण संरक्षणप्रति प्रतिबद्धता जनाइन्छ।

मन्त्रालयका अनुसार यस्तो प्रतीकात्मक कदमले ऊर्जा बचत, कार्बन उत्सर्जन न्यूनीकरण तथा दिगो जीवनशैली अपनाउन प्रेरणा दिने विश्वास गरिएको छ। साथै, यसले जलवायु परिवर्तन र जैविक विविधता संरक्षणजस्ता महत्वपूर्ण विषयमा जनचेतना बढाउन मद्दत पुर्‍याउँछ।

सन् २००७ मा अष्ट्रेलियाबाट सुरु भएको यो अभियान हाल विश्वका १८० भन्दा बढी देशमा फैलिएको छ, जहाँ लाखौं मानिस तथा प्रतिष्ठित संरचनाहरूले बत्ती निभाएर सहभागिता जनाउने गरेका छन्।

कतार सरकारले सबै नागरिक, व्यवसायिक प्रतिष्ठान तथा सरकारी निकायलाई सक्रिय सहभागिताका लागि आह्वान गर्दै “पृथ्वीको संरक्षणका लागि सानो प्रयासले पनि ठूलो सन्देश दिन सक्छ” भन्ने सन्देश दिएको छ।