इरानी मिसाइलको टुक्रा घरमा खस्दा चार जना घाइते
क्षेत्रीय परिस्थितिको निरन्तर निगरानीका क्रममा कतारको गृह मन्त्रालयले इरानी मिसाइल अवरोधसँग सम्बन्धित एक घटनामा सुरक्षा निकायहरूले तुरुन्त प्रतिक्रिया जनाएको जनाएको छ। कतारी हवाई रक्षा प्रणालीले इरानबाट प्रक्षेपित मिसाइलहरू अवरोध गर्ने क्रममा त्यसका अवशेषहरू मुराइख क्षेत्रस्थित एक नागरिकको आवासमा खसेको जनाइएको छ।
उक्त घटनामा एक कतारी बालकसहित चार जना मध्यम रूपमा घाइते भएका छन्। सम्बन्धित उद्धार तथा सुरक्षा टोलीहरूले तत्काल घटनास्थलमा पुगेर घाइतेहरूलाई प्राथमिक उपचार प्रदान गर्दै आवश्यक चिकित्सा सेवाका लागि स्थानान्तरण गरेका छन्। घटनास्थलमा सीमित भौतिक क्षतिको पनि विवरण प्राप्त भएको छ।
गृह मन्त्रालयका अनुसार सम्बन्धित निकायहरूले स्वीकृत आपतकालीन योजना अनुरूप काम गरिरहेका छन्, जसअन्तर्गत यस्ता घटनामा छिटो प्रतिक्रिया, प्रभावको नियन्त्रण तथा सार्वजनिक सुरक्षाको सुदृढीकरणमा ध्यान केन्द्रित गरिएको छ।
मन्त्रालयले सर्वसाधारणलाई जारी निर्देशनहरूको पूर्ण पालना गर्न, भीडभाड नगर्न, घटनास्थल नजिक नजान र भिडियो/फोटो खिच्ने कार्यबाट टाढा रहन आग्रह गरेको छ। साथै एम्बुलेन्स, नागरिक सुरक्षा तथा सुरक्षाकर्मीहरूलाई बिना अवरोध आफ्नो कर्तव्य निर्वाह गर्न सहयोग गर्न अनुरोध गरिएको छ।