अमिर कप २०२६ फाइनलका लागि टिकट बिक्री सुरु
दोहा, कतारमा आयोजना हुने प्रतिष्ठित ‘अमिर कप २०२६’ को फाइनल खेलका लागि टिकट बिक्री आज मे २ देखि सुरु भएको छ। कतार फुटबल संघले समर्थकहरूले दिउँसो १ बजेदेखि आधिकारिक वेबसाइटमार्फत टिकट खरिद गर्न सक्ने जनाएको छ।
अमिर कपको फाइनल खेल मे ९ मा खालिफा अन्तर्राष्ट्रिय रंगशालामा आयोजना हुने तालिका छ। खेल साँझ ५:३० बजे सुरु हुनेछ।
कतारको फुटबल क्यालेन्डरकै सबैभन्दा महत्वपूर्ण प्रतियोगितामध्ये एक मानिने अमिर कपको यो ५४औँ संस्करण हो। यस वर्षको प्रतियोगितामा पहिलो र दोस्रो डिभिजनका गरी २० टोली सहभागी छन्।
टिकट मूल्य विभिन्न श्रेणीमा निर्धारण गरिएको छ। क्याटेगोरी–१ का लागि ५० कतारी रियाल, क्याटेगोरी–२ का लागि ३० रियाल र क्याटेगोरी–३ का लागि १० रियाल तोकिएको छ। साथै, विशेष आवश्यकता भएका दर्शकका लागि पनि १० रियालमै टिकट उपलब्ध गराइनेछ।
प्रत्येक व्यक्तिले अधिकतम ६ वटा टिकट खरिद गर्न सक्ने व्यवस्था गरिएको छ। टिकट ‘रोड टु कतार’ मोबाइल एपमार्फत उपलब्ध गराइने जनाइएको छ।
अमिर कपलाई कतारको फुटबल सिजनको समापनसँगै आयोजना हुने सबैभन्दा प्रतिष्ठित प्रतियोगिताका रूपमा लिइन्छ, जसले हरेक वर्ष ठूलो संख्यामा दर्शकको आकर्षण केन्द्रित गर्ने गरेको छ।
टिकटका लागी : www.qfa.qa