समुद्री गतिविधि गर्न पाइने

कतारको यातायात मन्त्रालयले देशभरका सबै समुद्री गतिविधि पूर्ण रूपमा पुनः सञ्चालनमा आएको जनाएको छ। यसअघि सुरक्षा सावधानीका कारण अस्थायी रूपमा लागू गरिएको समुद्री गतिविधिमा रोक हटाइएसँगै सबै प्रकारका जलयान तथा समुद्री सेवाहरू पुनः सञ्चालन गर्न अनुमति दिइएको मन्त्रालयले जनाएको हो।

मन्त्रालयका अनुसार अबदेखि समुद्री यातायात, मनोरञ्जनात्मक जलयात्रा, माछा मार्ने गतिविधि तथा अन्य समुद्री सेवाहरू सम्बन्धित नियम र सुरक्षा मापदण्ड पालना गर्दै नियमित रूपमा सञ्चालन गर्न सकिनेछ।

यातायात मन्त्रालयले समुद्री क्षेत्रसँग सम्बन्धित सबै व्यक्ति तथा संस्थालाई आधिकारिक निर्देशनको पालना गर्न, आवश्यक सुरक्षा उपकरणको प्रयोग गर्न तथा समुद्री यात्राका क्रममा सुरक्षा सतर्कतालाई उच्च प्राथमिकता दिन आग्रह गरेको छ।