मिसाइल अवरोधको क्रममा खसेका भग्नावशेष लागेर तीन जना घाइते
इरानको आक्रमणपछिको अवस्थालाई निरन्तर निगरानी गरिरहेको कतारको गृह मन्त्रालयले स्वीकृत आपत्कालीन योजनाअनुसार सुरक्षा निकाय तथा नागरिक सुरक्षा विभागले तत्काल आवश्यक उद्धार तथा प्रतिकार्य प्रक्रिया सुरु गरेको जनाएको छ।
मन्त्रालयका अनुसार प्राप्त विवरण र घटनास्थलको मूल्याङ्कनका आधारमा हवाई प्रतिरक्षा प्रणालीद्वारा क्षेप्यास्त्र अवरोध गर्ने क्रममा खसेका भग्नावशेष लागेर एक बालकसहित तीन जना घाइते भएका छन्। घाइतेहरूको आवश्यक उपचार भइरहेको मन्त्रालयले जनाएको छ।
साथै, राष्ट्रिय सार्वजनिक सुरक्षा तथा आपत्कालीन चेतावनी प्रणाली आवश्यक परेमा मात्र अतिरिक्त सुरक्षात्मक उपाय लागू गर्न सक्रिय गरिने मन्त्रालयले स्पष्ट पारेको छ। सर्वसाधारणलाई आधिकारिक स्रोतबाट मात्र सूचना लिन, हल्ला फैलाउने वा पुष्टि नभएका सूचना, तस्बिर तथा भिडियो साझा नगर्न पनि आग्रह गरिएको छ। यस्ता गतिविधिले कानुनी कारबाही निम्त्याउन सक्ने मन्त्रालयले चेतावनी दिएको छ।
गृह मन्त्रालयअन्तर्गतका सुरक्षा निकायहरू चौबीसै घण्टा पूर्ण तयारीका साथ परिचालित रहेको जनाउँदै समुदायको सुरक्षा सुनिश्चित गर्न, आवश्यक परे तत्काल प्रतिक्रिया दिन तथा सार्वजनिक सेवा अविच्छिन्न रूपमा सञ्चालन गर्न सबै निकाय सक्रिय रहेको मन्त्रालयले जनाएको छ।
प्रेस विज्ञप्ति
