अबु सम्रा नाकाबाट लागुऔषध तस्करीको प्रयास असफल
दोहा। कतारको अबु सम्रा स्थलसीमा नाकामा भन्सार अधिकारीहरूले लागुऔषध तस्करी गर्ने प्रयास असफल पारेका छन्। जाँचका क्रममा अधिकारीहरूले २४.३९ ग्राम चरेस र शाबु (मेथाम्फेटामिन) तथा ३० वटा लिरिका चक्की बरामद गरेका छन्।
कतार भन्सारका अनुसार शंकास्पद यात्रुको सवारीसाधन तथा व्यक्तिगत सामान जाँच गर्ने क्रममा प्रतिबन्धित पदार्थ फेला परेको हो। ती पदार्थ सामान र कपडाभित्र लुकाएर कतार ल्याउने प्रयास गरिएको अवस्थामा बरामद गरिएको जनाइएको छ।
भन्सार अधिकारीहरूले आधुनिक निरीक्षण प्रविधि तथा विशेष तालिमप्राप्त टोलीको सहयोगमा तस्करीको प्रयास पत्ता लगाएको बताएका छन्। भन्सार विभागले देशको सीमा सुरक्षा तथा लागुऔषध तस्करी नियन्त्रणका लागि निगरानी र जाँचलाई थप कडा बनाउँदै आएको जनाएको छ।
कतार भन्सारले यात्रुहरूलाई देशमा प्रतिबन्धित वा नियन्त्रणमा रहेका कुनै पनि पदार्थ ल्याउनुअघि सम्बन्धित कानुन तथा नियमबारे जानकारी लिन आग्रह गरेको छ। अवैध रूपमा लागुऔषध ओसारपसार गर्ने प्रयासमा प्रचलित कानुनअनुसार कडा कारबाही हुने चेतावनी पनि दिइएको छ।