विश्वकप फाइनलको झगडापछि अर्जेन्टिनाका पारेदेसलाई १० खेलको प्रतिबन्ध
फिफाले २०२६ विश्वकपको फाइनलमा स्पेनसँगको खेलपछि भएको झडपमा संलग्न अर्जेन्टिनाका तीन खेलाडी र एक टोली अधिकारीलाई प्रतिबन्ध लगाएको छ। अर्जेन्टिनाका लियान्द्रो पारेदेसलाई १० खेल, नाहुएल मोलिनालाई ७ खेल र थियागो अल्माडालाई १ खेलको प्रतिबन्ध लगाइएको छ।
अर्जेन्टिनाका सहायक प्रशिक्षक रोबर्टो आयालालाई ३ खेलको प्रतिबन्ध र ३० हजार अमेरिकी डलर जरिवाना गरिएको छ। स्पेनका गाभीलाई पनि १ खेलको प्रतिबन्ध र ३० हजार डलर जरिवाना गरिएको छ। पारेदेस र मोलिनालाई ९०–९० हजार डलर तथा अल्माडालाई ३० हजार डलर जरिवाना गरिएको छ।
फाइनलपछि भएको झडपमा पारेदेसले स्पेनका एरिक गार्सियालाई घाँटीमा समातेका थिए भने गाभी पनि घटनामा संलग्न भएका थिए। फिफाले यी घटनालाई गम्भीर अनुशासन उल्लंघनका रूपमा लिएको छ।
यसैबीच, अर्जेन्टिना फुटबल संघलाई पनि विभिन्न अनुशासन उल्लंघनका कारण ३ लाख २१ हजार अमेरिकी डलर जरिवाना गरिएको छ। अर्जेन्टिनाका समर्थकको विभेदकारी व्यवहार तथा इंग्ल्यान्डविरुद्धको सेमिफाइनलपछि देखाइएको फकल्यान्ड टापुसम्बन्धी राजनीतिक ब्यानरसहितका घटनामा कारबाही गरिएको हो। अर्जेन्टिनाले आफ्ना आगामी दुई घरेलु खेलमा ५० प्रतिशत दर्शक क्षमतामात्र प्रयोग गर्नुपर्नेछ।
अर्जेन्टिना फुटबल संघले यी निर्णयविरुद्ध अपिल गर्ने तयारी गरेको जनाएको छ।