कतारको एलएनजी जहाजमाथि अरबियन खाडीमा आक्रमण
दोहा — कतारको ग्यास ढुवानी कम्पनी नाकिलातको एउटा तरलीकृत प्राकृतिक ग्यास (एलएनजी) बोकेको जहाजमाथि अरबियन खाडीमा अज्ञात वस्तुबाट आक्रमण भएको छ।
कतार समाचार एजेन्सी (क्यूएनए) का अनुसार कम्पनीको ‘अल मायदा’ नामक एलएनजी जहाज शुक्रबार साँझ, अक्टोबर ३० मा अरबियन खाडी हुँदै यात्रा गरिरहेका बेला अज्ञात वस्तुबाट आक्रमण भएको थियो।
घटनामा जहाजमा रहेका चालक दलका कुनै पनि सदस्य घाइते नभएको र वातावरणमा कुनै असर नपरेको कम्पनीले जनाएको छ। नाकिलातका अनुसार जहाज सुरक्षित अवस्थामा रहेको र सञ्चालन गर्न सकिने अवस्थामा छ। घटनाबाट जहाजमा परेको प्रभावबारे भने मूल्याङ्कन भइरहेको छ।
कम्पनीले चालक दलको सुरक्षा सुनिश्चित गर्न जहाज, त्यसमा कार्यरत कर्मचारी तथा क्षेत्रीय समुद्री सुरक्षा निकायसँग प्रत्यक्ष समन्वय गरिरहेको जनाएको छ। साथै, घटनाक्रमलाई नजिकबाट निगरानी गरिरहेको पनि कम्पनीले स्पष्ट पारेको छ।