दोहामा आठ देश सहभागी हुने एसियन पुरुष इमर्जिङ टिम्स क्रिकेट कप आयोजना हुँदै

दोहा, नोभेम्बर ३ — कतारको राजधानी दोहामा आगामी नोभेम्बर १९ देखि २९ सम्म २०२६ एसियन पुरुष इमर्जिङ टिम्स क्रिकेट कप आयोजना हुने भएको छ। प्रतियोगितामा एसियाका आठ राष्ट्रिय टोलीले उपाधिका लागि प्रतिस्पर्धा गर्नेछन् ।

कतार क्रिकेट संघको आयोजनामा एसियाली क्रिकेट परिषद् (एसीसी) को निगरानीमा सञ्चालन हुने प्रतियोगिताका खेलहरू वेस्ट इन्ड अन्तर्राष्ट्रिय क्रिकेट स्टेडियम र दोहा युनिभर्सिटी अफ साइन्स एन्ड टेक्नोलोजीको क्रिकेट मैदानमा खेलाइनेछन् ।

प्रतियोगितामा नेपालसहित भारत, पाकिस्तान, संयुक्त अरब इमिरेट्स (यूएई), श्रीलंका, बंगलादेश, अफगानिस्तान र हङकङ सहभागी हुनेछन्। सहभागी टोलीलाई दुई समूहमा विभाजन गरिएको छ। समूह ‘ए’ मा पाकिस्तान शाहिन्स, भारत ‘ए’, नेपाल र यूएई छन् भने समूह ‘बी’ मा श्रीलंका ‘ए’, बंगलादेश ‘ए’, अफगानिस्तान ‘ए’ र हङकङ रहेका छन् ।

नेपालले नोभेम्बर २० मा भारत ‘ए’ विरुद्ध खेल्दै प्रतियोगिताको यात्रा सुरु गर्नेछ। त्यसपछि नोभेम्बर २२ मा यूएई र नोभेम्बर २४ मा पाकिस्तान शाहिन्ससँग प्रतिस्पर्धा गर्ने तालिका छ। समूह चरणका खेल नोभेम्बर १९ देखि २४ सम्म सञ्चालन हुनेछन्। दुवै समूहका शीर्ष दुई टोली सेमिफाइनलमा प्रवेश गर्नेछन्। सेमिफाइनल नोभेम्बर २६ र २७ मा तथा फाइनल नोभेम्बर २९ मा वेस्ट इन्ड अन्तर्राष्ट्रिय क्रिकेट स्टेडियम (एसियन टाउन) मा हुनेछ।

नेपालको खेल तालिका

कतारमा आयोजना हुने यस प्रतियोगिताले नेपाली क्रिकेट समर्थकलाई दोहामै अन्तर्राष्ट्रिय स्तरका खेल प्रत्यक्ष हेर्ने अवसर प्रदान गर्नेछ।