दोहा। कतारमा यस साताको अन्त्यतिर तापक्रम उल्लेख्य रूपमा घट्ने मौसम पूर्वानुमान गरिएको छ। कतारको मौसम विभागका अनुसार उत्तरपश्चिमी हावा तीव्र बन्दै जाने भएकाले देशभर तापक्रममा गिरावट आउने सम्भावना छ।
विभागले सोमबार सार्वजनिक गरेको पछिल्लो मौसम पूर्वानुमानअनुसार आगामी दिनमा दिउँसोको मौसम सामान्य रहनेछ भने राति र बिहान सबेरै तुलनात्मक रूपमा चिसो महसुस हुनेछ।
यस अवधिमा अधिकतम तापक्रम २५ देखि ३३ डिग्री सेल्सियससम्म रहने र न्यूनतम तापक्रम १८ देखि २२ डिग्री सेल्सियससम्म झर्ने अनुमान गरिएको छ।
उत्तरपश्चिमी हावाको प्रभाव आगामी दिनमा पनि कायम रहने विभागले जनाएको छ। तापक्रम घटेसँगै विशेषगरी बिहान र रातिको समयमा चिसो बढ्ने भएकाले सर्वसाधारणलाई आवश्यक सावधानी अपनाउन सुझाव दिइएको छ।
मौसमसम्बन्धी पछिल्लो जानकारीका लागि विभागका आधिकारिक सूचना तथा पूर्वानुमान नियमित रूपमा हेर्न आग्रह गरिएको छ।