कतारमा पासपोर्ट वा कतारी आईडी हराएमा तत्काल जानकारी दिनुपर्ने

दोहा— कतारमा बसोबास गर्ने विदेशी नागरिकले आफ्नो पासपोर्ट, यात्रा कागजात वा आवासीय अनुमति (रेसिडेन्स परमिट) हराएमा वा बिग्रिएमा तत्काल सम्बन्धित सरकारी निकायलाई जानकारी गराउनुपर्नेछ। कानुनी व्यवस्थाको उल्लङ्घन गरेमा अधिकतम १० हजार कतारी रियालसम्म जरिवाना हुन सक्ने प्रावधान रहेको छ।

कतारको विदेशी नागरिकको प्रवेश, बहिर्गमन तथा बसोबास नियमनसम्बन्धी कानुन नम्बर २१, सन् २०१५ को धारा १५ मा यस्तो व्यवस्था गरिएको छ।

कानुनले विदेशी नागरिकको पासपोर्ट, यात्रा कागजात वा आवासीय अनुमति हराएको वा क्षति पुगेको जानकारी पाएलगत्तै सम्बन्धित सक्षम निकायलाई सूचित गर्न र हराएको वा क्षति पुगेको कागजातको सट्टा नयाँ कागजात प्राप्त गर्नुपर्ने व्यवस्था गरेको छ।

कुन अवस्थामा जरिवाना लाग्न सक्छ?

कानुनको धारा ४० को उपधारा २ अनुसार धारा १५ मा उल्लेखित दायित्व पूरा नगरेमा अधिकतम १० हजार कतारी रियालसम्म जरिवाना हुन सक्छ।

तर, १० हजार रियाल प्रत्येक घटनामा अनिवार्य रूपमा लाग्ने निश्चित जरिवाना होइन। यो कानुनले तोकेको अधिकतम जरिवाना सीमा हो।

महत्त्वपूर्ण कुरा के हो भने पासपोर्ट वा कतारी आईडी हराउनु अथवा बिग्रनु मात्र आफैँमा उक्त कसुर होइन। हराएको वा बिग्रिएको जानकारी पाएपछि पनि कानुनले तोकेको प्रक्रियाअनुसार सम्बन्धित निकायलाई जानकारी नगराउनु कानुनी उल्लङ्घन हो।

कागजात माग्दा देखाउनुपर्ने कानुनी दायित्व

धारा १५ ले आप्रवासीलाई आफ्नो बसाइ अवधिभर पासपोर्ट, यात्रा कागजात वा आवासीय अनुमति सम्बन्धित सरकारी निकायले मागेको अवस्थामा प्रस्तुत गर्नुपर्ने व्यवस्था पनि गरेको छ।

त्यसैगरी, सम्बन्धित निकायले मागेका आवश्यक विवरण तथा जानकारी तोकिएको समयभित्र उपलब्ध गराउनुपर्ने कानुनी दायित्वसमेत रहेको छ।

कतारमा बस्ने नेपालीले के कुरामा ध्यान दिने?

कतारमा कार्यरत तथा बसोबास गर्ने नेपाली नागरिकले निम्न कुरामा विशेष ध्यान दिनु आवश्यक छ :

१. पासपोर्ट वा कतारी आईडी हराएमा तत्काल सम्बन्धित निकायलाई जानकारी गराउनुहोस्।

२. पासपोर्ट, कतारी आईडी वा अन्य आवासीय कागजात बिग्रिएमा पनि त्यसलाई बेवास्ता नगर्नुहोस्।

३. हराएको वा क्षति पुगेको कागजातको सट्टा नयाँ कागजात प्राप्त गर्ने प्रक्रिया पूरा गर्नुहोस्।

४. सरकारी निकायले मागेको अवस्थामा आवश्यक कागजात तथा विवरण उपलब्ध गराउनुहोस्।

५. आफ्नो पासपोर्ट र कतारी आईडी सुरक्षित राख्नुहोस् तथा आवश्यक कागजातको डिजिटल प्रतिलिपि पनि सुरक्षित राख्नुहोस्।

कतारमा विदेशी नागरिकको कानुनी बसोबास व्यवस्थित बनाउन लागू गरिएको यो व्यवस्थाले व्यक्तिगत कागजातको सुरक्षा र समयमै सरकारी निकायलाई जानकारी गराउने जिम्मेवारीलाई स्पष्ट पारेको छ।