मेकाइनिस मोटेल क्वारेन्टाइनमा खानेकुरा ल्याउन निषेध
कतार सरकारको मातहतमा संचालित मेकाइनिस मोटेल क्वारेन्टाइनमा खानेकुरा र मादकपदार्थ ल्याउन निषेध गरिएको छ ।
पहिलोपटक कोरोनाभाइरसको महामारी पछि संचालित मोटेलमा सुरुको केही महिना उक्त नियम लागू थियो । तर महामारी नियन्त्रणमा आएपछि कतार आउँदा खानेकुरा ल्याउन दिइएको थियो । अहिले फेरि महामारी बढे संगै सो नियम कडा रुपमा लागू भैरहेको छ ।
नियम बारे थोरैलाई मात्र जानकारी हुँदा अहिले दैनिक रुपमा झन्डै एक टन भन्दा बढी खानेकुरा जफत हुनेगरेको छ । नेपाली लगायत अन्य देशका नागरिकले ल्याउने घ्यु,अचार,मासु,मकैभटमास,चाउचाउ,सुर्ती,चुरोट संगै अन्य ठुलो मात्रामा खानेकुरा जफत हुनेगरेको मोटेलका कर्मचारी श्याम बुढाले क्युएन खबरलाई जानकारी दिनुभएको छ । त्यसैले कतार आउँदा कुनै किसिमको खानेकुरा नल्याउन उहाँले सम्पुर्ण नेपालीलाई आग्रह गर्नुभएको छ ।
क्वारेन्टाइनकै लागि निजि होटेलमा बस्दा भने यस्तो समस्या देखिएको छैन ।
कतारमा न्यून तलब भएका कामदारको निमित्त बनाईएको मेकाइनिस मोटेलमा दैनिक हजारौं संख्यामा मानिसहरु क्वारेन्टाइनमा बस्न आउने गर्छन् । अहिले खोप लगाएका व्यक्तिले दुई दिन र नलगाएका व्यक्तिले सात दिन क्वारेन्टाइनमा बस्नुपर्ने नियम छ ।
