फिफा विश्वकप २०२२ को लागि टिकट बिक्री खुला हुने

फिफा विश्वकप २०२२ को लागि टिकट बिक्री दोस्रोपटक खोलिने भएको छ ।

भोलि मार्च २३ तारिक दिउँसो १ बजे देखि पहिले आउने खरिदकर्ताले पहिले टिकट पाउने आधारमा टिकट बिक्री खुला गरिने फिफाले बताएको छ । टिकट बिक्री २९ मार्च दिउँसो १२ बजे सम्मका लागि खुला हुनेछ ।

टिकट https://www.fifa.com/tickets बाट अनलाइन खरिद गर्न सकिनेछ । टिकट दर ४० देखि २,२५० रियाल सम्म तोकिएको छ ।

खरिद प्रक्रिया सफल भए लगत्तै सोही समयमा टिकट कन्फर्म हुने फिफाले जनाएको छ । यसअघि फिफाले गएको फेब्रुअरी ८ सम्म टिकट बिक्री खुला गरेको थियो ।

फिफा विश्वकप यसै वर्षको नोभेम्बर २१ देखि डिसेम्बर १८ सम्म कतारको विभिन्न सहरमा आयोजना हुँदैछ ।