विश्वकपको बेला तोकिएको स्थानमा मदिरा पिउन पाउने

कतारले यसै वर्ष आयोजना गर्ने फिफा विश्वकप प्रतियोगिता अवधिभर मदिरा प्रतिबन्ध हटाउने भएको छ ।

बिबिसीसंग कुरागर्दै सुप्रिम कमिटी फर डेलिभरी एन्ड लिगेसीका प्रमुख नास्सर अल खातेरले मदिरा सम्बन्धमा ठाेस निर्णय आउन बाँकि रहेको तर रंगशाला वरपरको स्थानमा किनबेच गर्न दिइने बताएका छन् । “तर यसको मतलब तोकिएका बाहेक अन्य सार्वजनिक स्थानमा मदिरा पिउन पाईने भन्ने होइन” उनले बताएका छन् ।

कतारले आज दोहास्थित अल बिद्दा पार्कमा ४० हजार क्षमता भएको फ्यान जोन क्षेत्रको घोषणा पनि गरेको छ । त्यहाँ मदिरा खरिद गर्न सकिनेछ ।

खातेरको अनुसार दर्शकले रंगशाला वरिपरिको स्थानमा खेल सुरु हुनुभन्दा अगाडि र खेल सकिएपछि मदिरा खरिद गर्न पाउनेछन् । रंगशाला भित्र मदिरा लान बन्देज गरिनेछ र भित्र मदिरा बाहेक अन्य पिय पदार्थ मात्र किनेबेचका लागि अनुमति दिइनेछ ।

कतार लगायत ईस्लामिक राष्ट्रहरुमा खुलेआम मदिरा पिउन प्रतिबन्ध छ । कतारले यसअघि देखि नै निश्चित होटेल तथा बारमा मदिराको किनबेच गर्न छुट दिँदै आएको छ । सन् २०१९ मा कतारले आयोजना गरेको क्लब विश्वकपको समयमा पनि विभिन्न स्थानमा राखिएको फ्यान जोन क्षेत्रमा मदिरा पिउन छुट दिइएको थियो ।

कतारमा नोभेम्बर २० देखि डिसेम्बर १८ सम्म फिफा विश्वकप २०२२ प्रतियोगिता आयोजना हुँदैछ ।