चितवनका किसानको समस्या लिएर कांग्रेसको भातृ संगठनले गरायो प्रधानमन्त्रीको ध्यानाकर्षण

चितवन, असार ३–

नेपाली काँग्रेसको भातृ संगठन नेपाल किसान महासंघ चितवनले यहाँका किसानहरुको समस्या समाधानको लागि प्रधानमन्त्रीको ध्यानाकर्षण गराएको छ ।

किसानको क्षतिपूर्ति, सुविधा र समयमा मलको समस्या समाधन गर्न चितवनका प्रमुख जिल्ला अधिकारी इन्द्रदेव यादव मार्फत प्रधानमन्त्री पुष्पकमल दाहालको ध्यानाकर्षण गराएका हुन् । दूध उत्पादक किसान, केरा उत्पादक किसान र माहुरीपालक किसानले व्यहोरेको समस्यामा गम्भिर हुन आग्रह गरिएको महासंघ चितवनका सचिव इन्द्रमणी गैरैले जानकारी दिए ।

ज्ञापनपत्र बुझाउने क्रममा नेपाली काँग्रेस चितवनका उपसभापति राजीव न्यौपाने, सचिव ध्रुव पोखरेल, नेपाल किसान महासंघका क्षेत्रीय अध्यक्ष परञ्जीवि ढकाल, सार्वजनिक सेवा कर्मचारी संघ चितवनका अध्यक्ष सुरेश अधिकारीलगायत सहभागी थिए । प्रजिअ यादवले प्रधानमन्त्री तथा मन्त्रीपरिषद्को कार्यालयमा उक्त ध्यानाकर्षण पत्र तत्काल पठाउने प्रतिवद्धता जनाए ।

दूध उत्पादक कृषकले दुग्ध विकास संस्थान र निजी क्षेत्रका डेरी उद्योगहरुले ६ महिनादेखी भुक्तानी नदिएको भन्दै सरकारसंग भएको सम्झौता अनुसार ४ अर्ब रकम भुक्तानीको ब्यवस्था गर्न माग गरिएको छ । यस्तै गत जेठको १७ गतेदेखी चार दिनसम्म आएको हावाहुरीले केरा खेतीमा क्षति गरेको भन्दै उचित क्षतिपूर्ति र र बिमा रकम तत्काल भुक्तानीको माग गरिएको छ । केराखेतीमा करिब १२ करोड बराबरको क्षति भएको प्रारम्भिक अनुमान छ । जसबाट ७ सय किसान मारमा परेका छन् ।

त्यस्तै समयमा मल नपाउने समस्याको पनि महासंघले विषय उठान गरेको छ । आवश्यकता भन्दा ४० प्रतिशत मात्र मल आयात हुने गरेको भन्दै पर्याप्त मात्रामा मल उपलब्ध गराउन माग गरिएको छ । दानाको मूल्य, नेपाल सरकारबाट पाउने बिमा, महको बजारीकराण्को समस्याप्रति ध्यानाकर्षण समेत गराएका छन् । नेपालमा वार्षिक ९ हजार मेट्रिक टन उत्पादित मह मध्ये चार हजार मेट्रिक टन महले बजार नपाएको भन्दै उचित बजारीकरणको ब्यवस्था मिलाउन माग गरिएको छ । धारासायी बनेको पोल्ट्री ब्यवसायको गहन अध्ययन गरी समाधानको लागि समेत माग गरिएको अध्यक्ष निलकण्ठ रिजालले जानकारी दिए ।

यस समाचारको श्रोत : www.narayanionline.com हो ।