इरानसँग सहअस्तित्व अनिवार्य: कतार

दोहा, कतारले इरानसँग सम्बन्धित सुरक्षा सुनिश्चिततामुखी वार्तामा आफू संलग्न नभएको स्पष्ट पार्दै खाडी राष्ट्रहरू र इरानबीच सहअस्तित्व अपरिहार्य रहेको जनाएको छ। साथै, इरानी आक्रमणमध्ये ९० प्रतिशतभन्दा बढी प्रयास विफल पारिएको दाबी गरेको छ।

कतारको परराष्ट्र मन्त्रालयका प्रवक्ता माजिद अल–अन्सारीले क्षेत्रीय परिस्थितिबारे प्रतिक्रिया दिँदै कतारले प्रतिकारको अधिकार सुरक्षित राखेको भए पनि तत्काल कुनै निर्णय नभएको बताए।

“हामी अन्तर्राष्ट्रिय कानुनअनुसार प्रतिकार गर्ने अधिकार राख्छौं, तर हामी यही क्षेत्रमा सधैं बस्ने भएकाले क्षेत्रीय शान्तितर्फ अघि बढ्नुपर्छ, तनावतर्फ होइन,” उनले भने।

उनका अनुसार प्रतिकारबारे निर्णय सैन्य मूल्याङ्कन र नेतृत्वस्तरको निर्णयमा निर्भर रहनेछ। “अहिलेसम्म त्यस्तो कुनै निर्णय भएको छैन, तर हामीले सुरक्षात्मक तयारीका सबै उपाय अपनाएका छौं,” उनले भने, “९० प्रतिशतभन्दा बढी आक्रमण विफल पारिएको छ।”

इरानसँगको सम्बन्धबारे उनले युद्धपछिको अवस्था तेहरानकै कदममा निर्भर रहने उल्लेख गरे। “कतार र इरानका जनताबीचको भ्रातृत्व सम्बन्ध राजनीतिक विषयभन्दा माथि हुनुपर्छ,” उनले भने, “अब आफ्नो सार्वभौमिकतामाथि भएको आक्रमणपछि गुमेको विश्वास कसरी पुनःस्थापित गर्ने भन्ने इरानकै जिम्मेवारी हो।”

खाडी राष्ट्रहरू र इरानबीचको दीर्घकालीन सम्बन्धबारे उनले सहअस्तित्वको विकल्प नरहेको दोहोर्‍याए।

“इरान हजारौँ वर्षदेखि यस क्षेत्रमा छ। यहाँका मानिसहरू पनि हजारौँ वर्षदेखि बस्दै आएका छन्। कोही पनि कतै जाने छैनन्,” उनले भने, “पूर्ण विनाश कुनै विकल्प होइन।”

उनका अनुसार भविष्यमा पनि सबै देशहरू छिमेकीकै रूपमा रहने भएकाले सहअस्तित्वको बाटो खोज्नैपर्नेछ। “हामी सधैं एकअर्काका छिमेकी हुनेछौं। मानवताको भविष्यका लागि पनि सँगै बस्ने उपाय खोज्नुपर्छ,” उनले भने।

मध्यपूर्वमा बढ्दो तनावका बीच कतारको यो धारणा कूटनीतिक संवाद, संयम र सहअस्तित्वमार्फत समाधान खोज्नुपर्ने सन्देशका रूपमा हेरिएको छ।